中環出更：話海岸公園規矩多 何俊賢誓保漁業
近年潮流興講環保，但到底係咪一講到環保就咩都要讓路？立法會漁農界議員何俊賢近日講起，喺海岸公園嘅問題上，政府每每企喺環保嘅高地，對漁業運作嘅考慮太少，又唔熟悉，真係冇人幫到佢哋，一定會喺呢件事上同政府拗到死咁話。
指捕魚許可證轉讓太苛刻
何俊賢話，過往政府喺捕魚許可證嘅傳承轉讓制度上太苛刻，搞到牌照數目大跌逾半，好不容易才同政府傾好，一人讓一步，所以政府才會建議收番四個海岸公園捕魚許可證，包括印洲塘、東平洲、海下灣、沙洲及龍鼓洲，並容許有「本地捕撈證」嘅漁船喺其他同將來新設嘅海岸公園捕魚。
到底新嘅海岸公園喺邊？何俊賢話，多數喺大型基建附近，但係依家呢個新制度仍有隱憂，雖然容許有「本地捕撈證」嘅漁船作業，但最擔心政府會加入好多限制，例如限制只可用某啲捕魚方式或設不適合嘅禁捕區。
憂政府唔熟業界亂訂規例
佢強調，並非覺得保育唔重要，但最擔心嘅係政府根本唔熟識業界，喺新嘅海岸公園設立一啲錯嘅規矩，到時又做唔到保育，又影響到漁民，所以佢到時一定會同政府拗到死喎。
卓妮