中環出更：譚文豪斥民航處 資料難搵唔實在
民航處近年問題不斷，尋日又有一單。立法會經濟發展事務委員會尋日開會，提到民航處已經上載咗國際民用航空組織就危險品空運安全嘅最新標準，本身為民航機師嘅議員譚文豪就批評有關資料難搵，而且唔夠實在添。
國際民用航空組織每兩年更新同公布一次《危險品安全空運技術指令》，民航處亦會檢視當中嘅修改，並就附屬法例提出所需修訂，而民航處網站已經發布咗最新修訂項目說明修訂詳情喇。
要求下次交立會要改善
不過，譚文豪就話花咗五、六分鐘先喺民航處網站搵出相關資料，而資料只以列表形式顯示，並無實質講明修訂咗乜，批評呢啲資料解答唔到疑問，事關乘客同機組人員要嘅係實在資料，希望下次提交文件畀立法會有更好展示，直指呢部分都要準備得更好，連主席鍾國斌都加把口話清晰啲好喇。運輸及房屋局副秘書長劉家麒就話聽到意見，未來附屬法例再交立法會審議時，會加番詳細資料喎。咁到時真係要睇吓有冇寫番清楚啦！
卓妮