政情：主持財會 被迫做醜人 劃線波哥受靶 鬧爆泛民

「明日大嶼」填海計劃鬧到滿城風雨，相關嘅前期研究撥款申請將交付財務委員會審議，但波哥去年接受訪問時形容反對項目嘅委員係「歷史罪人」，激起泛民不滿向波哥提不信任動議。鄺俊宇話，波哥批評反對填海嘅議員係歷史罪人，令人更感覺主席有立場，好擔心日後就填海撥款申請，會係易借易批，有專人全程辦妥，叫波哥要謹慎處理，唔好淪為財仔會主席。

提出不信任動議嘅郭家麒就話，項目未審，波哥就先批評反對嘅人，係對唔住下一代，怒斥從未見過咁差、咁離譜及咁不濟嘅主席，公眾對財委會有好大期望，政府卻當係提款機，仲引述坊間形容財委會主席係奴才，係皇帝唔急太監急，呼籲波哥唔好乜都攬上身。

多名建制議員力撐公正

多名建制派議員力撐波哥公正，反批泛民拉布抹黑、提問無水平等。何啟明仲向波哥「示愛」畀心心，話有波哥做主席係夫復何求。對於波哥去年講過十幾個鐘可處理填海撥款，何啟明就話自修改財委會議事程序後，泛民只可以用幼稚及瑣碎提問拉時間，波哥明知泛民水平唔高，拉布拉唔到幾耐，所以先評估十幾個鐘囉，唔係提早劃線。

波哥最後連珠炮發批評反對派混淆是非，罔顧事實，為求達到政治打壓同抹黑而不擇手段，係好可恥行為，而每當討論具爭議性項目時，議員都唔識停止發問，次次都要主席劃線做醜人，事後仲要鬧主席、怪責主席、衝擊主席，令主席血壓飆升，重申希望大家明白，會議拖一分鐘，香港會損失好多錢及機會咁話。

講真嗰句，「明日大嶼」爭議大就係人都知，但係泛民嘅往績都唔多好，事無大小都拉布，不斷重複提問，咁先會令外界覺得剪布合理，其實泛民與其浪費議會時間，不如諗吓點樣認真做事嘞！