跳馬王子新招世界盃封王 石偉雄等咗呢塊金牌10年！！

石偉雄今次以新動作「李世光跳」（笠松轉體270度後空翻兩周）完成賽事，初賽時發揮水準，以首名躋身決賽，打下一支爭霸強心針。決賽首跳雖然落地稍微出現失誤，取得14.667分，但經過同教練檢討，第2跳立即作出調整，跳出14.8高分，終以14.734分力壓意大利選手仙高蘭尼封王，應屆歐錦賽跳馬亞軍、以色列選手麥菲德夫以14.284分位列第3。

高難度動作爭奧運入場券

呢塊金牌，石偉雄話已經等咗10年，今次除咗動作升級，自己嘅頭銜亦可以升級，奪冠後「石仔」喺社交專頁分享喜悅：「由2009年開始一直參加世界盃，每次都同獎牌無緣，每次都係45678，次次都差少少，今次終於可以拎到世界盃冠軍，呢一塊獎牌我等咗10年，今年終於可以拎到啦。第1次用新動作，好大壓力，最終都可以順利完成。雖然做到新動作，但仲有好多瑕疵，嚟緊會繼續努力改善，希望下次會做好啲，除咗動作嘅Upgrade， Title都終於可以Upgrade，好多謝我嘅教練@sergiy777、屋企人，以及裁判專業嘅意見，體院嘅治療師、體能教練、營養師等等，幫助我嘅每一位同事，同埋總教練同總會嘅配合。」

石仔自舊年喺雅加達亞運會成功衞冕後，一直苦練新動作「笠松轉體270度後空翻兩周」，並提早喺今次克羅地亞站世界盃「亮劍」，為年底世錦賽爭取2020東京奧運資格作準備。佢稍後將征戰世界盃斯洛文尼亞站，繼續為港爭取佳績。

踏上高峰	多謝教練	「石仔」不斷努力，再次為香港爭光！

基層出生 奮鬥不懈

勿以為「跳馬王子」出自名門，其實石偉雄也是一名曾付出過無窮血汗，才能達至今天成就的基層青年。

「石仔」出身普通香港家庭，父親為小巴司機，年幼時家住彩雲邨，礙於資源限制但無阻他追逐「體操夢」。「石仔」6歲開始學習體操，2009年在學界體操比賽中嶄露頭角，同年開始穿起香港隊戰衣參加國際賽。2010年出戰廣州亞運，翌年參加世界體操錦標賽得第7，自此成為港隊主力。2012年參戰倫敦奧運雖然沒有斬獲，但在2年後的仁川亞運得到回報，在跳馬項目以15.216分奪金，創下香港的體操輝煌史。

克服傷患 再攀高峰

可惜好景不常，「跳馬王子」在2016奧運前夕遭遇嚴重傷患，未能取得里約入場券。要成為優秀運動員，需要無盡的鬥志，石偉雄彰顯了這項特質，克服重傷的他在去年復出參加世界盃，在跳馬項目得第5。其後在雅加達亞運中，以14.612分成績衞冕，再創高峰。「石仔」今次在克羅地亞舉行的體操世界盃摘金，對其爭取東京奧運入場券更添信心。

威水史

2009年

全港中學校際體操比賽‧4項冠軍

2011年

世界體操錦標賽跳馬項目‧第7

2012年

倫敦奧運跳馬項目‧第13

2014年

仁川亞運跳馬項目‧冠軍

2018年

世界體操錦標賽跳馬項目‧第6

2018年

雅加達亞運跳馬項目‧冠軍

2019年

世界盃跳馬項目‧冠軍