政情：郭家麒估計梁君彥前列腺正常

立法會內務委員會仲未選出主席，搞到立法會大會都只有主席梁君彥直踩主持，冇內會主席可以頂吓更，就算設有小休時間，梁君彥都要兩個幾鐘先有機會去廁所。本身係泌尿科醫生嘅議員郭家麒就認為，梁君彥去廁所嘅時間同正常人冇分別，都係兩、三小時去一次，估計佢前列腺冇特別問題。

梁君彥現時六十八歲，郭家麒指年紀大嘅人士可能會因為前列腺脹大嘅問題而出現尿頻，經常要去廁所，六十五歲或以上，約兩、三成人會有輕微徵狀，八十歲以上就有八成或以上會有輕微徵狀，例如會有尿頻，不過如果唔嚴重，有時都未必需要開藥o架！

至於外界會以為腎虧就會成日去廁所，郭家麒就話尿頻同腎虧無關，腎臟功能有問題，通常包括兩種，一種係腎衰竭，會令人屙唔到尿，另一種腎臟問題就會影響性功能，兩者都唔會導致尿頻。