中環出更：郭偉強夠醒 識破倫敦金求職陷阱
騙案咁常見，人人都難免遇過，尤其「倫敦金」同健身美容騙案數量都唔少，立法會議員郭偉強早前出席香港區潮人聯會第四屆就職典禮時就自爆自己做過「倫敦金」，初初加入時對方仲會同你計一條「實賺」嘅數添，佢後來發現唔對路，好快就冇做嘞！聽落都幾醒！
郭偉強話，當時搵暑期工，誤打誤撞搵到「倫敦金」公司，後尾自己認真計過，覺得點睇公司都唔夠錢營運，所以好快就冇做，仲發現其他一齊參加嘅人，可能有超過七成係「做媒」，所以剩低嗰啲一定畀人會「劏到一頸血」，奉勸年輕人：「真係冇咁大隻蛤乸隨街跳，如果隻蛤乸太大真係要諗清楚。」不過都因此知道「倫敦金」點運作，收到唔少求助個案都有幫助。
離境前遇電騙 張詩培嚇餐飽
講起騙案，同場嘅香港區潮人聯會副會長張詩培就話，自己遇過唔少騙案，最難忘係有次準備翌日朝早坐飛機離港，點知前一晚收到一個電話，聲稱係入境處通知已限制佢出入境，搞到佢都嚇一嚇，冷靜落嚟後，問番朋友了解吓，好快就發現係騙案，於是決定唔理，翌日當然順利出境啦。講起就到大學畢業生搵工嘅季節，依家都有唔少求職陷阱時，佢就話，依家網絡咁發達，年輕人可能未見工已有機會受騙，提醒年輕人多啲向長輩請教，相信長輩嘅經驗一定有用。
至於灣仔區議會主席吳錦津就話求職陷阱日漸普及，當中好多都係叫求職者先畀錢上個課程後，才可以獲安排工作，如果冇錢就誘導求職者去借，若果年輕人心急求職就好易中招。佢又話，雖然咩年代都有騙案，但以前借錢冇咁方便，呢類騙案相對少啲，建議年輕人認清自己嘅技能同本領，唔好貪心搵快錢，謹記「貪字得個貧」就唔會中招咁話。
卓妮