政情：假期最大收穫 潘佩璆返內地「打通經脈」

整掂電子支付 去到邊買到邊

非也，潘醫生所講嘅「痛處」，唔係佢獨有，好多港人都有嘅。係乜嘢頑疾？咪就係冇辦法喺內地用電子支付囉！潘醫生日前喺Facebook貼文，話無法喺內地使用電子支付，一直係佢同太太嘅「痛處」，親人搞咗一晚，終於幫佢哋「打通經脈」，用到電子支付嘞！

「打通經脈」之後，潘醫生同太太不知幾開心，因為佢哋行街可以去到邊、買到邊，例如生果同小吃等等，大讚非常方便，仲話係今次假期最大嘅收穫添！

潘醫生嘅貼文出咗之後，有網友深有同感，話若果喺內地冇微信支付確實好唔方便。亦有網友話內地發展好快，大多數都數碼化，但香港施政卻舉步維艱，自以為是，又話香港係塊福地，中西融和，應該有更好嘅發展嘅，潘醫生就回應話「完全同意，香港係生骨大頭菜—種壞！」