政情：陶君行悔當社民連主席
社民連近半年嘅黨爭以分裂告終，經歷過倒閣、不斷被「倒陶派」群起攻之嘅黨主席陶君行，尋日總結連串風波時雖話無悔同創黨主席黃毓民合作，但承認後悔坐上主席之位，因為經常順得哥情失嫂意，左右做人難。佢有感而發話，睇多啲愛情小說，有助佢睇化政黨嘅離離合合：「呢個世界，真係冇話冇咗邊個就唔得嘅。」
雖然干戈暫時平息，但今次黨爭卻觸發退黨潮。阿陶尋日話，四十多名報咗名參加今年區議會選舉嘅黨員，至今只得「維園阿哥」任亮憲、「鹵味男」錢偉洛同李偉儀等五、六人退黨，佔總數僅一成，影響應該唔大。
不擔心影響明年立會選情
對於有指今次分裂拖垮阿陶明年立法會選舉嘅選情，佢就話，上屆佢攞嘅以中產票為主，相信佢哋唔多上社民連黨員喜歡嘅網上討論區「香港人網」，唔多理會黨內無謂糾紛喎。
佢仲話嚟緊要帶領班活躍喺網絡嘅黨員「走出虛擬世界」，重返現實，做多啲地區實務喎。