畀人睇到希望嘅凱景兵…… 廖偉業：我揀啱地盤

凱景主教練「大頭文」馮凱文曾經表示，廖偉業雖然不是十八、廿二，卻是凱景其中一位，讓人看到「希望」的球員。「嘩！『馮Sir』誇張咗喇，好多謝佢今季畀呢個機會我，等我可以有咁多出場機會，好滿足、好開心！」平日沉默寡言的「偉業」道。

「無悔離開和富大埔！」

常常聽到人說：「有早知！無乞兒！」和富大埔今季有望挑戰港超聯冠軍，在亞協盃的表現亦愈戰愈勇，不知「偉業」可曾想過「早知唔走」呢？「一次都冇咁諗過！雖然凱景聯賽包尾形勢好危，但我從來冇後悔過今個球季前嘅決定。上兩季我喺大埔都好開心，因為黃威、『嘉耀』佢哋同我識咗好多年（曾經都是遵理在精英賽封王的冠軍隊成員），大家感情好好。不過開心還開心，我喺呢兩年上陣機會好少，同我心中嘅職業球員相差好遠，所以上季完咗之後，我同『堅Sir』好認真去傾過，決定離開去搵其他機會，我係『開心走』嘅，所以見到一班舊隊友今季成績咁好，都好戥佢哋高興，同埋我一啲都冇後悔過。」

捱同護級都要踢正選

「當初決定離開大埔，為咗賺取生活費，我去咗做地盤一個月。其實，如果唔係凱景，我諗我好大機會轉咗行喇！所以就算球隊依家水深火熱，我都冇諗過早知乜、早知物，喺凱景我出場機會好多，好滿足、好開心。」

「偉業」補充謂其「求踢」之決定，或許在他人眼中是任性行為，正因如此，所以非常感激一直支持自己的爸爸和哥哥，以及拍拖兩年多的女友「Miki」。「多謝佢哋，我會畀心機踢好每一分鐘嚟報答佢哋、報答畀過機會我嘅人！」場上十足拚命三郎的「偉業」堅定地道。

為堅Sir平反！偉業：佢冇蝦我

月初港超聯賽事，凱景主場迎戰和富大埔，賽事期間廖偉業在和富大埔後備席前，準備拿起地上的水樽飲水，卻被「綠戰士」主帥李志堅阻止，「堅Sir」更邊笑邊將水樽踢走，這成為了賽後最多球迷談論的一幕。

「係呀！完咗場好多朋友Send啲球迷留言畀我睇，有啲問我點解個教練咁樣蝦我。真係好好笑，其實我同『堅Sir』好好感情，雖然我冇黃威佢哋跟咗佢咁耐，但都2012年開始跟佢，佢一直好關心我，就算轉咗會我哋都有定期聯絡，嗰日我哋玩咋，大家千祈唔好亂諗呀！哈！哈！」

廖偉業Profile

出生日期：1992年9月19日

身高：1米73

體重：65公斤

司職：右後衞

曾效力球隊：橫濱FC（香港）、葵青、和富大埔

現效力球隊：凱景

文：戴陶蔚