政情：黃偉傑自動當選區議會主席
隨着早前二十七個鄉事委會改選，因應荃灣鄉事委會前主席鍾偉平退下火線，其荃灣區議會當然議席亦已換人，而佢身兼嘅區議會主席一職喺尋日進行選舉，而本身係副主席嘅黃偉傑喺冇對手下自動當選，「升呢」做主席。至於副主席嘅空缺則於五月才進行選舉，據悉，身兼馬灣鄉事委會主席嘅當然議員陳崇業大熱。
前主席鍾偉平撐場
其實，荃灣區議會主席選舉只收到黃偉傑一份提名表格，由身兼立法會議員嘅陳恒鑌提名，附議人包括身兼立法會議員嘅田北辰同區議員葛兆源。由於冇對手競爭，由黃偉傑自動當選，整個選舉過程兩分鐘完成。
早喺舊年年底，鍾偉平就承認退休，唔參加選咗十幾年海壩（和宜合道及國瑞道）原居民村代表，而鄉事委會主席一職早前亦由邱錦平接任。其實鍾偉平亦睇好黃偉傑可勝任區議會主席，而鍾尋日亦以公眾人士身份返區議會睇選主席，而喺選舉後仲同新主席黃偉傑及一眾舊同僚一齊影合照添！