中環出更：食嘢唔知價 巨無霸考起羅致光
立法會福利事務委員會尋日舉行馬拉松公聽會，由朝早九點半至下晝五點，七十幾個團體同代表講香港嘅貧窮問題，有地區工作者批評政府一直以數字誇口全民就業，稱貧窮情況有改善，但現實是貧窮並無改善過，指勞工及福利局局長羅致光如果走到前線，睇吓長者嘅工作情況，就唔會講出「六十歲仲可以做嘢」呢啲涼薄說話，又質疑佢係咪知道何謂尊嚴，知唔知一斤紙皮同巨無霸幾多錢？
IQ達一百六十嘅羅致光知唔知價錢呢？呢次考起佢嘞，見佢隨即喺議事堂用手機上網，搜尋連鎖快餐店有關巨無霸嘅價錢。咁即係唔知喇！IQ高都冇用，唔知民情就死得。跟住之後議事堂充滿火藥味，佢亦冇回答巨無霸同紙皮嘅價錢嘞！據了解，局長最愛嘅係魚柳包，難怪佢唔知價喇！
邵家臻揶揄政府叫「賴加強」
至於其他就業支援措施，羅致光同副局長徐英偉都列舉了政府一些固有計劃的加強或優化工作，社福界議員邵家臻揶揄，政府又賴冇地建公屋，又賴冇錢推行政策，而各項計劃都聲稱是加強版，更幫政府改了個人性化名字叫「賴加強」。
卓妮