政情：八網難逃：楊哲安巡區 同野豬對峙10分鐘
區議員就好似社區保長咁，乜都要理，仲要不時巡吓區，好似中西區山頂區區議員、教育局前政治助理楊哲安（Jeremy）前晚去巡區期間就撞到嘢，仲話被睥足十分鐘添！吓！係……？
話說Jeremy尋日喺社交網站Facebook上載咗段片，話前晚繼續定期巡邏工作，雖然落緊毛毛雨，但竟然見到有野豬出沒，仲係一拖一，即係一隻大野豬，一隻野豬BB。佢形容當時覺得自己有啲危險，好彩野豬冇走向佢，而佢亦冇行前再睇，事關佢驚野豬衝埋嚟，睇怕佢就返唔到屋企嘞！
野豬冇進一步行動，但佢就同隻野豬對峙咗十分鐘，到最尾野豬都係返轉頭去垃圾站食垃圾，而野豬食咗一輪就走咗，而垃圾站就滿地都係垃圾，又臭又唔衞生，仲話野豬帶出的垃圾問題一定要處理添！
呼籲街坊要保持距離
老實講，野豬出沒嘅問題唔單止喺山頂，仲已經擴散到全港，經過呢次對峙嘅經歷，Jeremy話班街坊夜晚出嚟散步撞到野豬點算呢？佢呼籲街坊要同野豬保持距離喎。