行政會議成員兼立法會議員葉劉淑儀過往多次喺立法會發言時批評領展，甚至曾經鬧出被領展恐嚇風波，領展最後發聲明否認。葉劉最近就轉移目標，批評香港房屋協會（房協）喺未有事先知會商戶下，將商戶正在租用嘅舖位公開招租，搞到有小商戶不獲續租，舖位仲要轉租予連鎖集團。葉劉質疑房協「領展化」，仲要求政府同房協盡快到立法會交代。
葉劉日前去信立法會房屋事務委員會，指房協轄下沙田乙明邨商場經營咗超過三十年嘅小商戶被拒絕續租。該小商戶從未違反租約，更喺六年前應房協要求斥資重新裝修舖位，但十月就收到房協通知，拒絕續租申請，房協更計劃明年二月將有關舖位轉租畀某連鎖集團添。
葉劉鬧爆房協好似領展咁連年大幅加租，扼殺屋邨商場及街市小商戶嘅經營空間，認為房協應照顧居民需要，營運模式都要貼近屋邨居民消費模式至得。佢直言對房協「領展化」感到非常憂慮，要求政府同房協到委員會交代。所以政府經常畀人鬧官商勾結，唔係冇原因o架。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
