中環出更：預防勝治療吳錦青推治未病中心
踏入四月，城中慈善團體開始換屆，尋日由今年成立一百周年嘅博愛醫院搶飲頭啖湯，舉行董事局就職典禮。新任主席吳錦青（David）話一百年認真唔容易，所以今年會推出一連串慶祝活動及多項新服務，例如在銅鑼灣成立首間「治未病」中心，同埋將中醫針灸戒煙計劃跨境推廣到深圳，令博愛嘅服務項目由現時九十五個增至一百個。
中醫治未病嘅概念近年備受關注，係指喺未病之前做好防範工作。David話，治未病更係香港首間中醫院其中一個重點發展項目。博愛同廣東省中醫院已落實合作，首階段計劃喺博愛位於銅鑼灣嘅針灸專科中心引入現代中醫檢測儀器為市民提供治未病服務，同時亦為日後香港中醫院嘅治未病專科服務累積寶貴經驗。
簡浩秋笑太太忙到「拋夫棄子」
想要健康，離不開運動。今屆升呢做副主席嘅黃曉君（Kelly）喜歡做高溫瑜伽，難怪佢身材好似後生女咁苗條。總理廖齡儀就鍾意打高爾夫球，個個星期都要打，仲話依家去旅行都係因為有高爾夫球友誼賽打先至吸引到佢，同朋友一齊打波、食飯兼且按吓摩，不知幾開心。第三副主席林群就話瑜伽、高爾夫球都鍾意，最近仲開始玩泰拳，出身汗，個人反應都快些，好過癮。
就職禮上亦趁機頒發多個獎項，第一副主席簡陳擷霞就攞到過去一年出席率冠軍，出錢又出力，十分有心。佢老公簡浩秋都有出席支持，仲講笑話太太忙到「拋夫棄子唔要孫」喎，認真幽默。簡太就笑稱，老公喺背後鼎力支持佢瞓身為慈善，查實係為咗有多啲自己時間就真喎。
卓妮