政情:佔中判決在即 戴耀廷 朱耀明 預咗坐監

二○一四年爆發長達七十九日嘅違法佔領行動(佔中),多區道路堵塞令市民怨聲載道,但包括壹傳媒黎智英(漢奸黎)等多名佔中搞手至今仍未落鑊,只有佔中發起人戴耀廷、陳健民、朱耀明等九人被控以煽惑公眾妨擾等六項罪名,將於下月九日判刑。戴耀廷尋日出席活動時就表明打定輸數,估計被判刑兩年至三十三個月,仲話已經做緊一啲入獄前嘅準備添。不過,佢就拒絕認錯,死撐坐監只係公民抗命嘅最後一步,所以心感平安,坦然面對裁決喎。如果人人都學佢咁以為坐監就乜都做得,真係天下大亂!

戴、陳、朱三人尋日上午去完網台節目,下午就參與一個由天主教團體搞嘅遊行,期間仲講咗好多判刑前嘅諗法,例如戴話用煽惑公眾妨擾罪告佢哋並唔恰當,如判佢有罪好可能會提出上訴,仲話見到有成四百人出嚟支持佢,覺得香港未來仲有盼望、仲未放棄喎。查實近年參與嘅人數愈嚟愈少,根據警方統計,尋日最高峰時都只係得二百九十人,咁少人都仲死撐話有盼望,唔通戴仲未肯面對現實?

唯獨陳健民話結果難估計

打定輸數嘅唔止戴一個,朱耀明都話當日決定行公民抗命呢條路時,就已經有坐監嘅心理準備,唯獨陳健民認為結果好難估計,事關呢條罪名過往從來都未用過,今次係第一次,所以根本就冇案例可以參考,加上近年同佔中有關或相類似案件嘅判刑,由唔同法官去判,結果都可以好唔同,所以現階段根本唔知結果會係點樣。不過,陳及後都提到,一旦入獄,佢希望剛過身嘅爸爸可以諒解,似乎暗示預咗會坐監,但死撐預咗坐監唔代表係認錯。

其餘四人或驚到唔敢蒲頭

至於「佔中九子」嘅其餘六人,就只有陳淑莊同張秀賢有參與遊行,其餘四個包括邵家臻、社民連黃浩銘、民主黨李永達及鍾耀華就完全無影,唔知係咪驚到唔敢蒲頭,定係着手搞緊準備入獄嘅事喇。戴耀廷就代為解畫,話四人心情平靜,相信近期都只係有啲事務安排,或者要多啲陪吓屋企人咁啫。戴耀廷咁講法,莫非李永達前晚(29日)去漢奸黎屋企真係為咗交帶「後事」?

第一手消息請下載on.cc東網iPhone/iPad/Android/Windows Phone Apps