中環出更：楊潤雄休假八天 蔡若蓮頂硬上
港府刊憲公布教育局局長楊潤雄於今日起休假八天，直至四月七日為止，期間由該局副局長蔡若蓮頂上署理局長職務。楊今次放假抖一抖，相信都係想回吓氣，皆因楊早前於立法會拒絕交代小三全港性系統評估（TSA）數據一事，激起民主派議員強烈不滿，民主派去信楊嘅上司、政務司司長張建宗（小肥張）打小報告，最後仲搞到要小肥張幫手打圓場，稱當局真係冇相關數據，而非刻意隱瞞或妨礙立法會監察政府工作。
處理大量爭議性項目
據知唔少立法會議員都計劃於四月上旬嘅特別財務委員會跟進新一份財政預算案有關教育範疇事宜，料楊到時會親自出席會議。唔知到時會否再同議員擦出火花呢？
翻查資料顯示，楊上次放假係去年底，當時係連放四日。據報楊今次休假會出門數天，事前已經做好局內交接工作，包括處理教育界關注嘅小學校長和副校長薪酬及架構問題，至於《國歌條例草案》涉及中小學學習奏唱國歌部分，近期就主力由蔡若蓮做解說工作。不過，正所謂解鈴還須繫鈴人，楊最緊要都係同業界保持通話，否則真係等同撼頭埋牆喇。
卓妮