政情：公民講場：骨灰龕都設期限 港人死都唔安樂

香港唔單止房屋短缺，連骨灰龕位都短缺，但短缺唔係新鮮事，最離譜係連龕位都設限期迫遷！政府上月中刊憲，將下一輪公營骨灰龕位編配開始，由永久存放改為存放二十年，之後仲要每十年續約一次，否則就將骨灰撒落海，空番多啲骨灰龕位出嚟，此舉被議員狠批擾民。其實新措施更滋擾先人，生前未必住得安樂，死後有個瓦遮頭都好正常，唔知食物及衞生局局長陳肇始有冇諗過，咁樣改一改會搞到先人「死都死得唔安樂」呢？如果高官淪落到以咁嘅思維做事，係咪連公屋及居屋都要設限期收番，叫市民瞓街呢？