中環出更：良師益友 林淑怡指導女學生成長
喺成長嘅階段，若果有人生導師指導嘅話當然最好不過。金紫荊女企業家協會（協會）日前舉行咗未來領袖獎學金及培訓計劃頒獎典禮，參與計劃嘅低收入家庭、具有企業家才能同對未來有抱負嘅女學生可獲得基金提供嘅培訓課程、工作坊、講座、與女企業家交流活動同企業實習訓練計劃等等嘅機會。
協會主席林淑怡分享咗做導師嘅經驗，佢話帶咗個學插畫嘅學生三年，期間對方搵到暑期工做，完成之後間公司覺得佢做得好，於是決定簽佢做長工，喺林淑怡嘅鼓勵下，雙方同意暫停計劃一年，畀學生把握呢個難得嘅機會，等佢專注工作。嗰日佢見到啲學生上台攞獎，由佢哋嘅笑容可以睇得出，學生好滿足同有成功感，佢又話計劃唔係填表格、經過幾輪面試就能夠攞獎學金，而係要靠付出同努力先有回報。
相輔相成 學年輕人角度諗嘢
第一常務副主席章曼琪話跟咗佢兩年幾嘅學生Carmen，由最初見面淨係打招呼，到依家變得開朗咗，甚至會主動打電話畀佢傾偈同約食飯，參與計劃亦都令佢學識點樣忍耐同喺年輕人嘅角度諗嘢，佢話以前以為得酒店或者酒樓係搞聚會嘅地方，直到出席學生喺主題派對房搞嘅感謝聚會，先發覺第時又多一個地方玩。
「良師益友」計劃其中一位導師徐詠琳話，開頭獲邀做導師嘅反應係「做老師就唔得，畀意見就可以」，結果做做吓都有年幾嘅時間，至於佢嘅學生彭雪淇，同一般年輕人都出現同一個問題，就係好怕醜。佢舉例，有次安排咗彭雪淇去一間物理治療中心做兼職攞吓經驗，但佢就遲遲無覆人，原因係彭雪淇怕醜，唔敢覆人，後尾經佢做橋樑，同中心聯絡番，彭雪淇就話佢係嚟學嘢，所以唔使要人工，呢番說話亦都令佢好感恩，估唔到有年輕人有「做嘢唔收錢」呢個諗法。
卓妮