政情：八網難逃：梁文廣為過手癮 申請水塘釣魚牌

近日淡水魚魚生含寄生蟲成為城中熱話，釣咗魚六、七年嘅深水埗區議員梁文廣就話，一早知道淡水魚唔可以生食，即使佢近日申請咗個本地水塘釣魚牌照，但都係為咗過吓手癮，釣上嚟影完相就會放生，甚少拎走。佢話平時會兩公婆一齊去釣魚，依家阿囝大咗都會跟埋去，多數去近市區嘅九龍水塘玩，主要目標係釣草魚。至於時間鬆動嘅話，佢一家會上魚排玩，目標魚種就多啲，好似羅非魚、泥鯭咁，有時仲可以用麵包釣烏頭添！