政情：研修議規議員多次領紅全年停賽

屢被逐離場 擬須罰款禁開會

早排立法會《廣深港高鐵（一地兩檢）條例草案》法案委員會審議到尾聲時，民主派議員幾度衝向主席台表達不滿，令到會議要暫停，更有議員被抬出會議室外。呢類「動作片」自修改《議事規則》後，已經甚少上畫，皆因新修訂規定被逐議員不得重返同一個會議開會，民主派議員都怕被趕走晒後，連「留名」投票嘅機會都冇埋。

之不過，似乎咁嘅懲罰仲未夠。議事規則委員會主席謝偉俊尋日出席電台節目時就話，唔少人都認為，即使議員被逐出場都冇後果，唔使負責任。佢更以世界盃為例，球員踢波被趕出場，起碼都要停賽一場喇，就算其他國會都會有後果要負責。佢仲話議規會將會研究進行罰款，同埋議員唔能夠出席會議嘅時間長度，直指如果多次被逐離場，整個年度都唔准落場。

查實每次抬議員，多多少少都會有保安受傷，而且有部分活躍嘅泛民「小生」都有啲噸位，唔係咁易抬得走。聽聞立法會內部曾經就「抬議員」掀起一番討論，有建議用輪椅推走議員，而考慮到會議廳有梯級唔方便就否決咗。另有人建議用擔架床，將被逐嘅議員綁喺床上抬走，不論點扭擰都易發力抬，更冇咁易整傷保安，可惜有意見認為用擔架床「好肉酸」，決定都係用番人手抬就算。

民主派度計扭過保安，試圖衝主席台、企上枱等，而保安同秘書處就要諗點防守，政府同建制派更要防突襲等，早已經掀起各方各面嘅討論。與其嘥時間傾偈出招同拆招，班議員不如花更多時間去做正經事好過喇！