政情：陳恒鑌為免「樹根化」 發言前查讀音
唔少立法會議員不時喺議事廳發言時拋拋書包，以四字成語或諺言表達意見，但係就經常出現「甩轆」講錯，其中「金句王」首推民建聯（民記）立法會前議員鍾樹根（樹根），自創「明張目膽」、「子烏虛有」等成語，而早前黨友葛珮帆亦講錯成「恨鋼不成鐵」，另一黨友陳恒鑌（Ben）為免「樹根化」，自爆每次講四字詞時都會先喺網上查讀音。
唔會因驚出錯避用
讀工程出身嘅阿Ben話，雖然對中國文學認識唔算深，但係四字成語同諺言都係民間智慧所累積，幾個字就可以表達到好多意思，所以唔會因為驚出錯而避用。佢又話除咗要留意成語內字詞嘅先後次序有冇調亂之外，最驚係讀錯發音。佢舉例話，之前想講「越俎代庖」，原本以為「俎」讀作「追」，好彩臨發言時用手機上網一查，先知道正確嘅讀音係「阻」，否則又為「樹根化」增添一筆嘞！
讀錯發言唔係民記「專利」，好似公民黨譚文豪亦曾將「馬首是瞻」嘅「瞻」字讀成「膽」。其實議員喺發言之前，用幾分鐘上網查一查讀音，總好過讀錯出街之後被人笑足幾年呀！