政情：陳振邦學琴 陪太子讀書
香港學生讀書壓力大，唔少父母無論返工幾忙都會擠時間陪太子讀書同返興趣班。香港化妝品同業協會理事長郭詩慧老公陳振邦（Davis）都唔例外，佢年幾前陪囝囝Jacob學鋼琴，自己都學埋。不過佢唔志在考級，笑言可以彈到首本名曲就心滿意足嘞！
冇諗住考級 練熟一首就夠
Davis話個仔四歲時學鋼琴，佢就跟住學，囝囝學彈古典曲，佢就學流行曲。唔知依家係佢定個仔級數高啲呢？Davis笑笑口話個仔正準備考級，但佢就冇諗過要考喇。依家佢已經識彈幾首流行曲，希望至少練熟一首，第日有機會上台獻吓醜咁就得喇。
Davis笑稱自己嘅藝術天分唔高，文科就叻啲，所以可能再同囝囝一齊學一種外語。Jacob年紀仲咁細，Davis一路陪讀一路學，咁咪分分鐘變成多才多藝嘅才子？