中環出更：唔想變張華峰 黃定光減肥每日食一餐
立法會議員黃定光（象哥）每年都會舉辦大閘蟹宴，不過今年因為無大閘蟹供港，就改用潮州凍蟹宴客，總算維持傳統。而喺席間就唔見象哥痛快咁食蟹，點解？佢就自爆正在減肥中，直言唔想變成立法會重量級議員、有「肥老闆」之稱嘅張華峰喎。
向來身形同樣有啲斤量嘅象哥透露，最近九個月已經減咗六公斤，體重由九十八公斤逐步回落。其實能夠減到六公斤成績相當不俗，但象哥並無自滿，更透露以八十公斤作為減肥目標。
皆因血脂膽固醇超標
象哥現時距離八十公斤尚有一段距離，最終能否達成目標就仍然係未知之數，但尋日象哥進食時幾有節制。不過，佢竟然話已經食得太多，打算唔食晚飯，仲透露平日一日只食一餐，果然為減肥出盡法寶！
乜嘢事迫使象哥減肥？皆因佢早前畀醫生警告血脂、膽固醇等全部超標，已經唔可以唔減磅，再加上太太經常為佢炮製愛心湯水，而且全部都有健康功效，佢就大嘆唔想浪費湯水，所以只好例行減肥，睇嚟太太嘅湯水非常有效用。
象哥嘅徒弟、立法會議員周浩鼎（Holden）都有嚟捧師傅場，大家一齊擦蟹。Holden話自己唔係特別鍾意食大閘蟹，而今次食嘅潮州凍蟹，味道好鮮甜，由於剝晒殼，所以食得好方便，亦不失為一個新嘗試。
至於象哥另一個徒弟、香港中華出入口商會副會長許華傑，最近開咗全港首間電競酒吧，開業頭兩個月都有賺，最好賺就係搞活動，尤其遊戲供應商，有新Game就會搵佢哋租場試玩，亦有人建議佢開多間分店，但佢就覺得要先站穩陣腳先。
卓妮