中環出更：雷鼎鳴證內地先進：朋友「叫雞」手機付款

話「支爆」係幻想 應面對事實

雷鼎鳴喺研討會上指出，內地生活上好多嘢已經方便過香港，畀錢乞丐都可以拎個手機出嚟「照一照」，又話識到有個朋友叫雞，「佢叫雞都係隊個咁嘅手機」，呢啲事香港仍未做到。講到內地經濟發展時，佢又話香港有種人好唔妥中國，假設中國就冧，網上有個最肉酸嘅字係「支爆」（中國崩潰論），但佢認為呢條路係幻想，所以呢啲人應面對事實，尤其係中國發展好快係大家着數嘅事，唔應該迴避。

另外，佢提到獲保釋等候上訴嘅香港眾志秘書長黃之鋒，近日勸美國總統特朗普對中國小心啲，否則會影響美國，批評黃之鋒「我唔知點解佢夠資格可以講呢啲咁嘅嘢啦」。佢又提到互聯網令人以為自己意見先係真理，舉例指舊年有兩位「小學雞」宣誓有啲問題，但係睇佢哋表情，「佢真係唔知自己真係咁戇居o架喎」，事關二人以為網民喺群組見到呢種做法一定拍爛手掌，但係其後發現同社會大多數人完全相反，先令佢哋驚訝。

卓妮