政情：推「主席指示」感委屈 波哥謀急流勇退？

波哥喺節目中形容兩、三歲時已識得嗌交，尤其係遇到唔公道嘅情況時更甚，而佢認為「拉布」令議會失去功能，無法盡快解決民生問題，所以以往要「剪布」嘅時候喺鏡頭前都會同非建制派議員嗌得好勁，而推「主席指示」只為令財委會回復應有嘅功能，佢又比喻現時嘅財委會似一個「深切治療部」，如果制度改好之後就會變番「普通病房」。

稱事前公開修訂太蠢

對於推「主席指示」，佢形容自己係「忍辱負重」同「好委屈」，皆因佢覺得自己提出修訂嘅內容好清晰，又笑指自己太蠢先會事前將有關修訂向外公開以提高透明度，唔想其他人覺得佢「陰濕」，希望用數據同道理說服人，但無奈嘅係反對派並唔「埋單」，更將咁簡單嘅事搞咁到大，又話「點解要搞住我呢？」佢更打趣話目前非建制派嘅反擊力度唔算大，已算係幫忙。

人氣爆升，被問到下屆立法會選舉會唔會「轉戰」地區直選，但佢話完成今屆任期後，將唔會再擔當議員工作。唔通係因為非建制派議員常與議會唱反調感到心淡，所以想急流勇退？佢話退休同非建制派無關，又指依家非建制派嘅阻撓同前議員陳偉業相比只係濕濕碎。

想同屋企人多啲相處

咁點解想退休？佢話最主要嘅原因係年紀問題，自己二十幾歲開始做嘢，都做咗四十多年，其中喺立法會服務香港市民更有十二年之長，所以希望可以休息吓，同家人多多相處，彌補番與家人相處嘅時間，佢都感嘆「想同兩個仔玩嘅時候，唔知佢哋點解大得咁快。」佢又話退任後會去其他地方長住，例如瑞士或其他歐洲國家，希望日日都可以行吓山，過悠閒嘅生活。但話口未完，佢又話其實呢啲都係願望嚟嘅啫，不過自己去意已決，除非有突發情況，迫不得已先會留低。咁講，即係冇完全閂晒閘喇！