政情：曾俊華念念不忘 幫肥彭回魂
前財政司司長曾俊華喺無申報下第三度於商台「開咪」，曾任末代港督彭定康（肥彭）私人秘書嘅曾俊華，尋晚講到美國六、七十年代嘅情況，同依家香港好似，其怨氣都係積累而成，佢其後無厘頭提起肥彭，話肥彭曾經講過唔可以當子女係殖民地，要當佢哋係主權國家看待喎。
仲記得肥彭於一個多月前訪港，曾俊華有出席並聽取肥彭嘅午餐會演講，莫非曾俊華對肥彭念念不忘，因而主動提起肥彭講過嘅說話？同樣令人估唔到嘅係，肥彭唔喺香港都「回到魂」，今次係透過曾俊華引述其言論，認真耐人尋味。
此外，曾俊華喺節目中又提及佔領行動，之不過都係陳腔濫調，稱年輕人有理想表達睇法，社會上應有更大包容，去聆聽年輕人，溝通多啲、了解多啲，就咩事都可以解決得到。唔知曾俊華做官期間，又做咗乜實質嘢去幫助年輕人呢？