中環出更：打風遊日行山 吳永嘉橙衫保命
話說早前颱風蘭恩肆虐日本，咁啱立法會議員吳永嘉（Jimmy）同公司同事都去咗日本飛驒高山，白川鄉旅行，見Jimmy着住一件鮮橙色T-shirt打底，外面再包住一件鮮橙色褸，想搶鏡呀？
話有危險都易被搵到
Jimmy話雖然颱風蘭恩咁啱登陸日本，但係佢去嘅地方風都唔算大，只不過啲雨落得好密，導致風景唔係好靚，影相都要擔住把遮，幾唔方便之餘，仲有小小狼狽添！咁點解着到咁鮮色，為咗影相搶鏡？Jimmy就解釋，由於成個旅程大部分都係戶外活動，始終颱風都仲未走，佢都驚上山會遇到乜嘢危險，上身着定鮮橙色嘅衫，都可以容易啲被搵到啊嘛！原來係為咗保住條命。
旅行遇着打風，咪好掃興？但Jimmy話最尾都係盡興而歸嘅，皆因可以食到雪場蟹同飛驒牛，班員工又可以瘋狂掃日本激甜蜜瓜，但係佢就覺得一個蜜瓜要成兩舊水真係好唔抵，所以無買到。
卓妮