政情：趙麗娟唔做會計搞藝術都得
會計師經常要對住大堆數字，有時做到頭都暈埋，好似香港會計師公會前會長趙麗娟（Susanna）就搵到佢嘅愛好去調劑生活，事關佢公餘時熱愛跳拉丁舞，但原來除咗鍾意跳舞，佢都擅長玩唔同嘅中國樂器，所以佢都好有自信咁話，如果唔做會計師，可能會做藝術家喎。
從小已經學笛子
早前香港文化中心舉行咗「樂響香江音樂會」，Susanna亦係座上客之一，前往欣賞管弦樂團演出。Susanna話鍾意接觸藝術，更自爆從小已經學習笛子，睇嚟係高手喎！不過佢話有一段時間曾經中斷學習笛子，所以佢最有信心都係跳拉丁舞咁話。問佢夠唔夠膽表演拉丁舞？佢就耍手兼擰頭話唔好搞佢喇。
除咗笛子之外，Susanna仲識得拉二胡同埋彈揚琴，估唔到咁多才多藝喎。佢就解釋，學習中樂嘅人精通一項樂器後，就會發展另一個專長，所以音樂嚟講最耍家都係笛子囉！