政府由今屆區議會開始，向每名區議員發放一萬元嘅外訪津貼，等佢哋可以去外國考察。不過，唔少已經動用呢筆外訪開支嘅區議會都選擇去內地考察，連飛機都唔使搭，終於灣仔區議會考察團，決定今年十一月出發去日本嘅大阪同京都，成為首個動用外訪津貼去內地以外考察嘅區議會。
負責考察團行程嘅區議員林偉文話，議員對外訪都有唔同嘅意見，有人提出過去新加坡，但最後都落實去大阪同京都。佢話今次外訪預計人均花費一萬三千元，即每個議員要貼三千元左右；主要行程會考察京都嘅保育文化，以及日本最新嘅安老服務。
除咗睇吓當地歷史文化，今次行程嘅另一重點，係針對灣仔區未來有可能興建地下城，去大阪市地下街取經，睇吓當地成功要素。林偉文強調今次係低成本考察團，故意選擇十一月淡季出發，貪酒店同機票較為經濟實惠；亦有人建議去埋東京，但計過交通費都係決定去大阪同京都就算嘞！