政情：上屆議員大嘥扔垃圾使十幾萬

剩餘物資舊到冇人吼

據了解，秘書處為咗避免造成浪費，已經將仲用得嘅物資送畀非牟利團體。不過有啲嘢太過殘舊，無法轉讓，所以秘書處就聯絡回收商，但係連回收商都嫌啲嘢「醫番都嘥藥費」，計算成本後就決定不接呢單生意。秘書處最後只能夠自行處理，結果掉垃圾都使咗十多萬元。如果議員使用立法會物資時多加注意同珍惜，就唔使變大嘥鬼喇！

另外，立法會舉行會議期間都有唔少傳媒到場採訪，議員林卓廷見秘書處提供畀記者使用嘅桌椅似乎唔太足夠，就向秘書處提出增加會議室外嘅桌椅。不過曾經有議員不滿喺立法會採訪工作嘅記者喺會議廳外用膳，唔知林卓廷嘅建議會否遭嗰位尊貴嘅議員反對呢？