中環出更：陳雲借「盾牌因緣」拉關係
外號「國師」嘅本土派學者陳雲、其門生中出羊子，以及由本土民主前線發言人黃台仰一手提攜嘅梁天琦，均表明有意在九月立法會選舉循新界東出選，令本土派支持者擔心三人會互相分薄票源「攬炒」。陳雲近日突然喺佢社交網站專頁，上載一篇黃台仰幾個月前進行嘅專訪，講述咗陳雲、中出羊子同佢本人嘅一段「盾牌因緣」，並疑似暗示黃加入社運圈子，都係由佢而起。
社交網上載黃台仰專訪
黃台仰喺專訪中透露，自己好早就參與社會運動，但以前同圈中人都唔熟，直至前年佔領期間，佢喺社交網站見到中出羊子整緊木板盾牌，其後「不要臉地」向中出羊子要求拎一啲來用，結果中出羊子、佢本人及其同伴，一同喺中出羊子嘅工作室被捕，而中出羊子被拘留期間展現「真誠和堅定的意志」，更改變咗佢對整個社運同政治認識。
整篇專訪其實冇提到陳雲，但陳雲就為專訪加上引言，指「一場因緣。陳雲教人造盾，昭明公主（中出羊子）大量生產木盾，黃台仰參與造盾而與昭明公主一同被捕，令黃台仰感受到昭明公主的非凡能力。」莫非陳雲想靠呢個緣起，拉攏三方協調選舉部署？