佔領中環發起人之一、香港大學法律系副教授戴耀廷一向係民主派中嘅「屎橋王」，佢先後提出嘅佔中、協調立法會選舉嘅雷動計劃及特首公投都失敗告終，最近佢又再次提出「風雲計劃」，建議唔同泛民團體透過加強協調爭取過半數區議會議席。不過，戴過往嘅計劃都劣迹斑斑，幾乎完全冇人睬佢，據聞佢日前出席民主動力會議時再提「風雲計劃」，被與會嘅民主派人士連番質疑！
戴耀廷本周三喺民主動力會議上，講解佢發明嘅「風雲計劃」，目標喺一九年區議會選舉中搶佔過半議席，包括在港九新界要合共取得二百一十七個議席，再經由區議會界別進入特首選舉委員會。佢希望有三百個民主派人士願意參與，而當中有年輕嘅專業人士。不過，建議未獲民主派人士支持。
有民主派人士質疑，未必有足夠嘅專業人士想參與，戴當時就立即褪軚，話退休人士和教會中人都可以，又改口話專業人士可以提供支援，好似中醫義診咁。同時亦有人提出疑慮，覺得落區要投放時間同心力，若果有參與風雲計劃嘅人半途而廢，擔心「一粒老鼠屎，壞咗一鍋粥」，做壞招牌就民主派攞嚟衰；睇嚟呢單嘢最後都係失敗收場。