政情：律師會理事改選何君堯連任失敗
香港律師會尋晚舉行周年大會及理事改選，有八位候選人角逐五個理事席位，其中四人係角逐連任，包括熊運信、馬華潤、白樂德（Denis Brock），以及身兼立法會議員嘅律師會前會長何君堯，而四位新參選人為黃栢欣、楊慕嫦、羅彰南（Jonathan Ross）及Robert Rhoda。結果獲泛民推薦嘅熊運信、馬華潤、白樂德、羅彰南及Robert Rhoda全數勝出，何君堯等三人就落選。
任建峰狙擊成功 何得票最低
過往嘅律師會理事選舉，主要着重候選人資歷同對業界嘅貢獻，今次卻牽涉政治鬥爭。親泛民律師、法政匯思召集人任建峰，繼年前成功迫使親建制嘅律師會前會長林新強下台後，近日又動員業界反對何君堯連任理事，多次撰文「數臭」對方嘅言行，即使何君堯入稟法院控告佢誹謗都唔肯收手。
任建峰又推出包括熊運信等親建制人士嘅五人名單，務求集中票源踢走何君堯，最後真係畀佢狙擊成功，而且何君堯仲係八位候選人當中得票最低。睇嚟律師會畀泛民徹底攻陷嘅日子已不遠了。