政情：議員唔開會反斥「被跟蹤」
近年立法會拉布已成為常態，政府每逢有重大議題要喺立法會審議或表決，就會派出由政務官組成嘅「狗仔隊」，（目及）實啲開會時坐唔定或「走堂」嘅建制派。議員咁大個人都仲要畀人監視，自然周身唔自在，聽講建制派內有人有微言，連泛民都有人不滿。民主黨（白鴿黨）立法會議員許智峯（峯鴿）早前就聯同黨友去信政府要求解釋，據了解立法會都會去信行政署要求當局檢視。不過話時話，議員如果坐定定盡番議員開會職責，又使乜政府出動狗仔隊呢？
政府狗仔隊喺立法會（目及）實議員出入，以防佢哋投票時走咗去都已非新鮮事。不過政府就嚟換屆，部分問責局長為咗「好頭好尾」唔好甩轆，所以近幾個月都係咁出動狗仔隊箍票。
指應如議助限出入
正所謂物極必反，政府咁做亦令包括建制派在內嘅部分議員反感。有議員已經去信個人資料私隱專員公署投訴，而立法會行政管理委員會亦都將會去信政府行政署要求交代狗仔隊人數、派出原因、收集咗嘅議員行蹤資料會點處理等，甚至有人要求就狗仔隊人數設限，好似早排限制議員助理喺立法會大會等會議出入立法會樓層咁。
泛民固然以侵犯個人私隱為由大張旗鼓，被睇到實嘅建制派亦都認為，咁大個人要投票自然會投，唔使班狗仔隊「湊」。亦有意見認為，立法會早前都嚴格限制議助，對狗仔隊呢啲外來人亦都應該有限制，否則唔公平。加上狗仔隊其實都係以公帑聘請嘅政務官，初入職嘅月薪動輒幾萬蚊，以衡工量值角度，花幾萬蚊請人記錄議員出入，又係咪恰當使用公帑？
議題屬「炒冷飯」之作
其實好多年前，時任白鴿黨立法會議員李華明已經提出過政府狗仔隊問題，不過當時就畀黨友、時任議員劉慧卿潑冷水，反指狗仔隊嚟立法會都冇咩問題。所以話，峯鴿依家再「插」狗仔隊，其實都只不過係炒冷飯。如果議員唔想喺立法會見到咁多狗仔隊，不如自己勤力啲出席會議喇！