每個男士都希望女友擁有天使嘅外表，同時又有魔鬼嘅身材，但係當遇到心目中嘅女神時，卻又會認為「這些機會不是屬於我的」，皆因如此誘人嘅美女，總係有種拒人於千里之外嘅感覺，不過南韓人氣模特兒殷池藝，雖然外形出眾，卻予人非常親切嘅感覺。
喺南韓模特兒界中，好似殷池藝咁樣貌如天使般純真迷人，卻同時擁有前凸後趷嘅魔鬼身材，真係相當少見。可能有人會話呢種天使同魔鬼嘅混合體，喺模特兒界有大把啦，點解會話相當少見呢？事關池藝嘅樣貌甜美得嚟，有種超凡脫俗嘅感覺，呢種女仔的確喺業界少之又少。此外，魔鬼身材固然常見，但係好似池藝咁擁有36、24、36嘅天然完美身段，就唔係個個都擁有。事實上，作為一位如此外在條件出眾嘅女神級模特兒，原來佢自細夢想從事演藝事業，希望做歌手或演戲。既然係咁，點解後嚟佢又會加入Model行列呢？有次一個攝影師朋友搵佢客串做模特兒，卻估唔到呢輯相片不但獲得極佳回響，而且令佢覺得模特兒工作相當有趣，之後佢兼職做Model，直至2013年才正式成為全職模特兒。池藝話雖然佢一直希望從事演藝工作，但經過深思熟慮後，覺得模特兒工作正好為未來嘅演藝事業打好基礎，就係咁開始模特兒生涯。
初出道時，池藝主打平面模特兒嘅工作，及後佢喺首爾舉辦嘅國際車展上以車模身份登場，當時佢相當緊張，唔係因為要公開演出，而係佢擔心未能做到最好，幸好佢表演得相當淡定，更憑住迷人樣貌及火辣身材，成為展場上嘅亮眼焦點，令佢人氣急升，更被稱為最有潛力嘅車模！初次演出咁成功，為佢打下一支強心針，其後佢喺多個大型車展上亮相，同時喺多個大型商品展示會上以Show Girl嘅身份示人。而大部分模特兒都會喺人氣急升後踩入賽車女郎界，但係池藝由出道至今都冇做過賽車女郎，點解呢？其中一個原因係佢唔可以曬太陽，否則皮膚會好容易出現色斑，為咗避免呢個情況，惟有選擇唔做賽車女郎，更避免各種露天嘅演出。不過大家又唔使擔心咁樣會影響到佢嘅曝光率，皆因佢工作多到接唔停手，加上佢親切嘅形象，非常受歡迎。事實上，佢性格溫柔，尤其係同心儀男士相處嘅時候，更顯得相當小鳥依人添！除此之外，佢更係一位烹飪高手，每當有時間都會入廚煮幾味，佢話自己係一個傳統女性，希望將來能夠為另一半準備好每一餐，等對方感受到家庭溫暖。一個既有外在美又有內在美嘅靚女，試問有邊個男人會唔鍾意？
簡介：殷池藝最迷人嘅地方，除咗清新得嚟又甜美嘅樣貌，火辣身材更係相當吸引，而佢亦一啲都唔吝嗇將自己美好身段收埋，經常將性感自拍照放上網畀大家欣賞，男士們千祈唔好錯過！
網址：http://cafe.daum.net/silverfox1205
出生地：首爾
身 高：170cm
三 圍：36、24、36
撰文：魂