政情：楊岳橋愈做議員愈肥仔

立法會議員楊岳橋（Alvin）一向被指身材飽滿，進入議會後仲愈食愈肥，仲有埋肚腩添！Alvin尋日就連同多名黨友自爆磅數，向來搞鬼嘅Alvin上磅時顯得尷尷尬尬，一磅之下有成一百七十一磅，至於另一議員飛機師譚文豪一百七十三磅，估唔到仲重過Alvin，佢哋都話要減肥喎。

Alvin尋日率領四名黨友，包括譚文豪、「小鮮肉」余德寶、鄭達鴻同埋助理錢偉健（大圍金正恩）出嚟，仲即場上磅，其中錢偉健最重，達二百四十九磅，最輕係鄭達鴻有一百六十九磅，而楊岳橋同譚文豪就中中挺挺，各一百七十多磅。

點解要自爆磅數？其實係為咗佢所屬政黨公民黨嘅籌款晚宴，話要「削肉救黨」喎。Alvin話市民每捐出一萬元，佢哋五人就會合共減一磅，最多減二十磅。除咗「賣肉」籌款，若果籌款額達四十萬元，該黨就會為金主舉行沙灘派對，唔知到時Alvin同陳淑莊會唔會泳裝上陣呢？

該黨又透露，晚宴邀得候任特首林鄭月娥出席，而落選嘅特首候選人曾俊華亦會到場，佢哋亦有邀請部分政府官員出席，現正等待回覆。