政情：收料站：質疑張永森能力區內建制叫讓位

下半晝會議需由他人主持

張永森大病初愈之後兩次出席區議會會議，佢出現時需要以拐杖輔助，而且右手紮住。有當區區議員透露，張永森請假之後改以左手寫字，而主持會議時亦唔好似以前咁「坐足全場」，下半晝會議要交畀副主席陳偉明代為主持。

有消息人士透露，區內建制派區議員曾私下討論張永森嘅病情，仲質疑張嘅工作能力。消息人士話，張永森從來都無交代自己病情，所以有人擔心佢未能主持會議，而根據佢近日嘅表現，似乎有啲體力不繼。

不過，亦都有其他建制派覺得，若果主席係因為犯事而要求佢讓位好似都言之成理，但主席因病而被「逼宮」，道德上好似講唔過去。而且，深水埗區議會內建制同泛民區議員數目係十二對十一，有人擔心張永森被逼宮之下會倒戈，因此唔敢妄動。