政情：公民講場：橋禍一卸千里 「信」佢一成都死

港珠澳大橋香港段嘅工地上月底發生工作台斷纜墜海意外釀成多人傷亡，勞工界質疑政府對工地安全監管不力，認為工地安全問題已響起警號，最近多次對外解畫嘅勞工處處長陳嘉信，尋日接受傳媒訪問時，竟然將責任歸咎於承建商同工人不熟悉新嘅施工技術，仲話安全工作係由工程倡議人同埋地盤承建商負責，否認處方巡查不足喎。正所謂意外一宗都嫌多，按照陳嘉信嘅邏輯，加上官字兩個口，處方凡事都可以置身事外。