政情：何君堯中途離團惹議 反轟有人內心狹隘
來自各黨派合共十八名立法會議員日前一連兩日到東江流域一帶考察，了解供港東江水水質最新情況，但今次考察團發生一段小插曲，就係獨立建制派議員何君堯，於行程中途突然離隊一段時間，惹來個別議員質疑有關做法並不恰當，何君堯事後於facebook解畫，反轟有人大做文章，今次行程其中一個得着係「防人之心不可無」喎。
稱事前已通知秘書處
何君堯於考察中途離隊惹來個別議員質疑不滿，何君堯透過fb解畫重申，事前曾就中途離隊一事通知立法會秘書處，又批評「面對我時就一個臉孔，擰轉臉就插人」，狠批有議員「好唔成熟」，去到當地係考察，而唔係插佢背，形容「你刷我背就冇問題，你插我背就冇意思」。
何君堯其後更進一步指，今次行程其中一個得着係可以近距離睇清楚啲人嘅面孔，事關佢話發現有啲人內心狹隘兼有眼紅症，仲鍾意雞蛋裏挑骨頭添。何君堯今次就中途離隊一事火氣十足，唔知會否影響自己同其他議員嘅關係呢？