政情：何啟明賴政府慢 企硬唔推失業金

闊佬懶理叫失業軍轉行

疫情肆虐近一年，唔少行業頂唔順，倒閉裁員。工聯會九龍東總幹事鄧家彪(阿彪)早前就搵咗何啟明喺網上論壇講《施政報告》嘅勞福政策。之但係今份報告甫發布，已經被狠批內容冇新意兼炒冷飯。阿彪就講明唔收貨，冇失業金之外，對就業支援仲明顯不足，話希望可以喺下年3月、財政預算案出爐前有多啲好消息喎。雖然何啟明就話歡迎大家提意見，但即刻畀阿彪寸佢「好簡單，就係設失業金制度喇」，啟明被窒到口啞啞。

被問到政府幾時先肯設立失業援助金，何啟明就死撐失業金都係治標唔治本，又賴政府手腳慢，想整套系統出嚟，可能打完疫苗都未整到喎。佢就反建議失業大軍轉行，指依家仲有好多行業缺人，之但係被問到依家仲有咩行業等人手時，佢就只係數得出安老行業，仲話「咁依家冇嘢做都頂住先啦」。

被轟做副局冇用淪跑腿

呢番說話令人覺得佢有啲闊佬懶理喎，莫非做咗官真係離地啲？再講，按之前專家估計全民接種疫苗要用兩年時間，照咁講何啟明咪即係話個失業金系統整兩年都搞唔掂囉，但係呢屆政府任期得番年幾，到時佢仲有冇得留低都唔知喇！

當日何啟明唔做議員入咗「熱廚房」，外界同佢所屬嘅工聯會都希望佢喺政府入面爭取多啲勞工權益，但事實上係好多人鬧佢乜都做唔到，仲好似畀政府同化咗一樣，對打工仔嘅苦況視而不見，就連工聯榮譽會長陳婉嫻都鬧佢做咗副局冇用，只係當局嘅「跑腿」呀！劣評如潮，唔知佢有冇後悔加入「熱廚房」呢？