港產官僚成日叻唔切，結果往往唔衰攞嚟衰。好似發展局局長陳茂波咁吖，佢尋日寫網誌文章大吹特吹，話蓮塘/香園圍口岸工程進度理想，會全力爭取一八年完工，又形容新口岸有助鞏固本港喺珠三角區域發展嘅地位，真係唔知嘅就嚇死，知嘅就笑死。
係人都知，香港地大型基建甩漏多多，延誤當食生菜，「波叔」咁早就牙斬斬講實完工日期，會唔會老定咗少少呢。仲有吖，波叔講啲唔講啲，報喜不報憂，上述工程超支情況嚴重，淨係建造口岸及相關設施，短短幾年間已超支近兩倍，波叔對呢一筆隻字不提，唔係語言偽術又係乜吖。
當然喇，大型基建項目拖拖拉拉，蓮塘工程只係小兒科。呢，啟德體育園由九八年開始籌劃，明明主流民意同體育界人士都舉腳贊成，點知港府一味歎慢板，研究復研究，諮詢復諮詢，一時土地規劃，一時融資問題，淨係一個多用途室內體育館座位數量已經一改再改。雖然港府承諾明年向立法會申請撥款，預計二二年落成，但即使冇事冇幹順利達標，造價已經比兩年前多咗一百億元，納稅人認真冤枉。正如「東方報業民意調查」顯示，大部分受訪者狠批港府諮詢沒完沒了，浪費時間，有人甚至擔心港府態度左搖右擺，項目最終淪為紙上談兵添。
講真，大型基建延誤成災，淪為公共財政無底洞仲係其次，削弱香港競爭力先至大鑊。最典型例子係港珠澳大橋，動工至今多災多難，一波三折，至今通車無期，問題係時間唔等人，本港物流業不復當年勇，貨櫃港一哥地位早就不保，即使大橋通車都變明日黃花。大部分受訪者認為基建發展緩慢，令香港錯過機遇甚至影響民生，激起民怨，絕對唔係杞人憂天。
講起真係羞家。無論港珠澳大橋抑或高鐵，都係畀香港拖後腿，特別係港珠澳大橋，珠海同澳門段進展理想，通車萬事俱備，點知因為要「等埋香港」而推遲通車；至於高鐵咯喎，香港段工程一延再延，造價一飆再飆，每公里平均造價冠絕全球，真係唔到你唔服。
冇計喇，回歸咁多年，亂足咁多年，成個社會淨係掛住政治鬥爭，內鬥內耗，「香港速度」已經淪為「蝸行牛步」代名詞。之所以搞成咁，講嚟講去咪因為港府無能囉。大部分受訪者狠批冇靈魂政府議而不決，蹉跎歲月，證明市民眼睛係雪亮嘅。
內地官媒最近批評政客拉布令香港近年發展不如新加坡，計功夫茶話齋，唔使無良政客搞事，淨係港府基建自我「拉布」已經玩死香港喇！