正所謂上得山多終遇虎。電話騙案沉寂一輪後死灰復燃，唔少市民上當失財，最近接連有兩宗騙徒斷正嘅畸士，總算幫班苦主出番啖氣，可謂大快人心！
話說尋日一名女子接到自稱政府部門人員電話，指佢涉及一宗刑事案件，要繳交一百萬元現金「調查保證金」，好在事主夠冷靜，即時吩咐僱用嘅司機報案，結果警方喺交款地點當場拘捕一名十八歲日裔少女。據講有人期間曾出示虛假警員證件，而今次亦唔係第一次以「調查員」身份收錢，直頭做戲咁做，都咪話唔誇張。
不法之徒遇着醒目市民固然無運行，撞正警察更加係自取滅亡。一段名為「當騙子遇上真警察‧第一回合」嘅貼文日前被上載至警隊臉書，內容大致係一名警員收到冒充入境事務處人員嘅電話，聲稱佢喺上海幫另一女子代辦港澳通行證，警員矢口否認，而「第二回合」不日將於警隊臉書連載。
即係咁，警方做呢類「真人騷」唔係話唔得，但始終都係加強執法，從源頭打擊詐騙集團最實際。大家有眼見，內地當局舊年聯同香港警方直搗印尼電騙大本營，有關案件一度銷聲匿迹，可惜風聲過後又無以為繼，結果電騙案野火燒不盡，春風吹又生。睇下數字就一清二楚，上個月電騙案損失金額高達三千二百萬港元，比八月份上升兩倍，證明執法一暴十寒，蚊都瞓蛇都死。
當然喇，蒼蠅不叮無縫的蛋，就算警方及傳媒點不厭其煩提醒都好，市民自己都要提高警惕至得。嗱，咪睇政府宣傳片教人提防騙徒，好多時都搵長者同學生妹做主角，查實好多苦主都係飽讀詩書之士。過去兩星期本港至少發生十多宗「公安查案」電騙案，受害者當中不乏九十後大學生甚至大學教授；而講到高級知識分子淪電騙苦主咯喎，最轟動莫過於去年台灣中央研究院前副院長劉翠溶被騙二千多萬新台幣。呢位世界級學者事後解釋，自己「從來唔睇新聞」，「唔知呢個世界有咁壞嘅人」，你話點會唔出事吖。其實萬騙不離其宗，騙徒唔係威逼利誘就係利用事主貪小便宜嘅心理，市民只要保持冷靜，遇事搵親朋戚友商量，騙徒自然無所施其技。
一句到尾，要斷詐騙集團米路，淨係市民醒水係唔夠嘅，警方同樣要持之以恒加強執法，絕對唔可以手軟。仲有國產官僚吖，咪以為事不關己，係人都知，好多電騙案雖然源自台灣，但就被內地「發揚光大」，繼續坐視騙子橫行肆虐，盞激化中港矛盾，大家都冇癮嘅咋！