雖然佔中已經過咗兩年，但仍然死唔斷氣，繼日前魔鬼山出現「我要真普選」直幡，尋日多間大學校園又飄起港獨旗幟。呢邊放煙花慶祝，喜氣洋洋，嗰邊大搞哭喪，陰氣重重，你話香港點會有太平日子過吖。
包括港大、中大、嶺南同香港教育大學等多間院校，尋日朝早不約而同喺當眼處發現同款紅底白字、寫上「香港獨立」嘅直幡，部分院校報警求助，部分自行拆除。雖然好似恐怖襲擊咁，對於今次掛幡事件，冇人肯承認責任，但有激進組織唔單止對整個行動瞭如指掌，仲話自己有份協助設計同製作，成單嘢擺到明有組織有預謀。
話時話，港獨思潮氾濫校園，唔單止喺大學長驅直入，連中學都不能幸免。好似上述組織咁，最近公然喺鬧市校區派發港獨傳單，仲聲稱已經發展上百個「信徒」，都咪話唔得人驚。
校園播獨停不了，講到尾都係因為港府姑息縱容。唔使講第樣，淨係校園內可唔可以討論港獨，港產官僚已經左支右絀，章法全無，一時話冇討論餘地，一時又話討論要以《基本法》為大前提。最離譜嗰個都係教育局局長「吳得掂」，居然大腳將個波傳畀學校同老師，話相信佢哋有經驗處理港獨問題喎。當然喇，一班大學校長同教授亦唔好得幾多，面對滔滔「獨禍」，一個二個好似鵪鶉咁粒聲唔出，話就話對年輕人「包容」，實際上只係明哲保身，咁搞法，校園想唔烏煙瘴氣都幾難！
香港就係咁嘅嘞，是非混淆，違法零成本，睇吓班佔領黑手到依家仲係逍遙法外就知咩料，仲有嗰班年輕獨派政客，參選時簽承諾書扮擁護《基本法》，點知一入局就反轉豬肚，有人鼓吹港獨公投，有人揚言宣誓時夾雜本土私貨，當局一樣吹佢哋唔脹，學生哥有樣學樣，咪搞成今日咁囉！
講真，班激進分子搞風搞雨，唯恐天下不亂，如果唔係居心叵測，就肯定係太傻太天真。試諗吓，強如台灣，獨立一樣係「做不到就是做不到」，連台獨都係發白日夢，香港有咩把炮學人搞獨立吖！大家有眼見，十一黃金周黃金不再，旅遊零售業得番半條人命，呢啲正正係港獨搞事分子嘅「傑作」，有人話港獨毒港，可謂一針見血。
北大人話齋，香港好，大家好，香港亂，大家一齊埋單。當然喇，有人要死冇理由唔畀佢死，既然獨派分子咁戀殖，大可自己拉大隊「歸英」，可惜神女有心，襄王無夢，英國人講到明一國兩制運作良好，唔會收番香港，睇嚟獨派都係疊埋心水，自己搵個孤島摺埋，到時想點「獨立」都得啦喇。