退休警官急下海 原來服務有錢人

一個禮拜流流長,等周末等到望穿秋水,「憂鬱星期一」係打工仔最難捱嘅日子。不過對於警隊前一哥曾偉雄呢位打工皇帝嚟講,尋日筍工上任,錢途無可限量,呢個星期一直頭要開香檳賀賀佢喇!

話說曾偉雄去年五月退休,轉個頭就獲准出任某大財團「集團戰略官」,尋日開始履新,據聞新工月薪十萬大元,雖然低過一哥嗰陣時,但已經羨煞普通打工仔。至於其他警隊前高層亦各自各精彩,有人任職私人保安公司高層,有人擔任地產商顧問,總之個個都搵到主好人家,同樣可喜可賀。

當然喇,同人唔同命,同遮唔同柄,人哋有大孖沙睇起,大家唔恨得咁多。之不過搵真銀還搵真銀,最緊要食相唔好太難睇,高官退休搵工至少要過兩年冷河,家陣未夠鐘就獲批返新工,除咗官官相護,更令人質疑當中有冇涉及官商勾結延後利益,同埋係咪有人在任時執法偏私,加入警隊係為社會服務,定係為有錢人服務。係人都知,警隊高層掌握唔少機密敏感資料,急不及待下海,你話市民會有咩觀感吖?

講起真係唔知好嬲定好笑,香港實行所謂「高薪養廉」制度,隨手揦起件高官,唔單止人工分分鐘高過奧巴馬,卸任後仲可以獲取數以千萬計退休金兼終生咬長糧,照計應該冇後顧之憂,可以專心享受人生至係,點知高薪養唔到「廉」,反而食大咗啲人嘅胃口,淨係警隊高層已經有辦你睇,自從前特首曾蔭權爵士嘅細佬曾蔭培退休後急急腳加盟地產商集團,開風氣之先,有人加入商界,有人幫賭場做嘢,有人甚至同黑社會大佬拍住上。難怪有人話,既然佢哋堅持退而不休,不如索性取消退休金同長俸,起碼可以幫納稅人慳番筆吖!

講到呢度,功夫茶不期然諗起幾個月前中區警署一幅外牆倒塌,當時有人話係預示警隊內部七國咁亂,雞犬不寧,依家睇番果然係珍珠冇咁真。鬼咩,上樑不正下樑歪,高層一個二個掛住謀後路搵真銀,班細嘅咪有樣學樣囉,近年涉及警方嘅醜聞多到天光都數唔晒,監守自盜、警署內非禮、涉嫌為黑幫通風報信、被指包庇南亞人蛇犯罪集團,簡直係鑊鑊新鮮鑊鑊甘。所以話,面係人哋畀,架係自己丟,警隊民望不斷插水,甚至一度創回歸以來新低,以致被冠上「黑警」惡名,講到尾都係自己攞嚟衰嘅咋。

都係古人講得啱︰紀綱一廢,何事不生?連最講究紀律嘅警隊都好似無掩雞籠咁,成個香港妖孽橫行,烏煙瘴氣,又有乜出奇吖!