相信大家細個一定玩過扑老鼠遊戲︰啱啱扑低一件，另一隻又趷起身，搞到你周身唔得閒。其實港產官僚都係一樣，唔到死人冧樓從來唔做嘢，結果按下葫蘆浮起瓢，呢頭撲完火嗰頭又起火，香港唔七國咁亂至奇喇。
話說荔枝角有工廈違契開設冰上曲棍球場，源源不絕嘅寒氣令樓上經營音響生意嘅單位大積水，地氈幾乎擰得出水咁滯，搞到要開行風機兼墊高貨物，頭都大埋。苦主先後向滲水投訴調查聯合辦公室、地政總署以及消防處等投訴，唔使問阿貴，又係畀人當波咁踢來踢去，官老爺唔係話唔關佢哋事就係話冇潛在危險，其中地政總署嘅藉口簡直令人嘆為觀止。佢哋話喎，近排好多迷你倉個案要跟進，其他投訴唔該排吓隊先，催得兩催，索性話自己「好忙」，真係畀佢吹脹。
冇錯，事有輕重緩急，但違法就係違法，見而不理點都講唔過去。試想像熱心市民見到有人打荷包，立即報警求助，你估對方可唔可以話「近排好多販賣軍火同械劫銀行案要跟進」，叫報案人「排吓隊」吖嗱？有立法會議員就講得啱嘞，既然有人投訴，而冰球場又的確造成滋擾，加上明知有人違反地契，咁都唔打擊，只會令人覺得可以亂嚟。
咁又係呀，當局依家嚴打工廈迷你倉，自然冇乜人咁蠢頂風作案，之但係唔開迷你倉仲有好多搞作，BBQ場、補習社、Band房甚至派對出租場地等任君選擇。呢啲場所有啲人流高度集中，有啲滿布消防隱患，出起事上嚟，分分鐘杰過迷你倉大火，當局今日打擊工廈迷你倉，聽日取締工廈派對場地，頭痛醫頭，腳痛醫腳，同鋸箭療傷嗰位蒙古大夫有咩分別？
冇計喇，港產官僚就係咁嘅嘞，唔見棺材唔流眼淚，如果唔係爆大鑊又或者輿論壓力，想佢哋做嘢都難。好似工廈冰球場呢單嘢，喺本報再三追問之下，地政總署終於死死哋氣應承向涉事業權人發警告信，要求限期內糾正，又警告如果限期屆滿後仍未糾正，有可能進行釘契咁話。講就講到好強硬，但實際做唔做得到，仲要睇過至知。事關近排地政總署胡混度日，醜聞多多，淨係橫洲發展計劃縱容霸地單嘢已經搞到怨聲載道，今次所謂嚴厲執法，會唔會又係敷衍民意？
講到尾，工廈違規亂象鑊鑊新鮮鑊鑊甘，其實只係港府有法不依，選擇性執法嘅冰山一角。對佔領搞手及黑手捉小放大，不良傳媒一而再再而三觸犯法例卻屢被放生，呢啲都係典型例子。港府黑白顛倒，甚至助紂為虐，唔怪得民怨沸騰喇！