港府成日呻「地從何來」，又話見縫插針，又話寸土必爭，好似周身唔得閒咁，查實官老爺眼皮底下有大批靚地，偏偏唔去發展，搞到呢頭盲搶地，嗰頭浪費資源，你話係咪荒天下之大謬吖！
呢嗱，中環舊郵政總局就係典型嘅生人霸靚地例子嘞。中環新海濱規劃多年，直到近日城規會終於審議有關規劃大綱，點知原來要等到中環新郵政局落成後，至會拆卸舊局。正如有立法會議員話齋，規劃程序本身已經夠複雜，加上港府官僚作風嚴重，萬一好似北角邨地皮咁，丟空十年八載，蚊都瞓蛇都死。大部分接受「東方報業民意調查」訪問嘅市民批評港府處事緩慢，議而不決，浪費土地，真係一啲都冇講錯。
講到浪費土地，暴殄天物，唔能夠唔提食環署轄下百多間公眾街市，其實好多都冇「地盡其用」，長期空置有之，被檔主用嚟擺貨，甚至淪為迷你倉亦有之，街市實際營運率超低，食環署闊佬懶理，卒之搞到公帑流血不止。係人都知，市民購物模式轉變，街市衰落無可避免，與其浪費資源，白白養蚊，不如交番出嚟改建住宅好過。
不過嘥氣啦，公眾街市管理不善嘅問題講咗N咁多年，申訴專員同審計署鬧到口水都乾，食環署官僚咪又係意見接受，態度照舊。鬼咩，又唔係官老爺私人物業，納空租又好，長期養蚊都好，關人個關咯！
咁就難怪香港地官地任霸唔嬲，經營停車場、回收場、倉庫甚至打造豪宅等，悉隨尊便，官府唔單止唔會執法，有時仲會提供便利，批埋租約都仲得。至於公務員宿舍以及私人會所土地，唔係長期丟空就係賤價批出，結果同樣係得物無所用。對於呢啲亂象，市民(興)過辣雞。上述民調顯示，大部分受訪者狠批珍貴土地資源被浪費，官僚不作為助長霸地歪風，難辭其咎。
最離譜嘅係，港府發展土地唔係先易後難，反而捨近求遠，一時話要填海造地，一時話要徵用部分郊野公園，結果添煩添亂，弄巧成拙。橫洲發展搞到滿城風雨，好大程度就係因為當局唔優先發展無人居住嘅棕地，反而犧牲非原居民利益，被批評官商勾結，都係自己攞嚟；仲有當局為興建資助房屋，不惜打舊年至啟用嘅足球訓練場地主意，擺明欺軟怕硬，又唔見政府收番富豪高爾夫球場？
計功夫茶話齋，想避免收地爭議，話都冇咁易。禮賓府靜中帶旺，風水又好，而且佔地二萬幾平方米，反正特首一家人都住唔晒，不如大庇天下寒士，市民肯定拍爛手掌！