強積金制度千瘡百孔，劣評如潮，早就唔係新聞嘞。至弊港府對民意呼聲充耳不聞，所謂改革措施唔湯唔水，不監不管之下，強積金投資回報年年跑輸大市，積唔到穀不特止，反而蝕凸，打工仔一殼眼淚，改名叫強輸金就差唔多。
嗱，有勞工界立法會議員就市面三十八個強積金計劃共五百三十七隻基金進行研究，發現投資回報令人失望，逾六成五跑輸過去一年百分之三點二通脹率，而去年同前年嘅比例係四成七及三成一，反映強積金嘅表現不斷退步。如果計算過去十年平均回報率，情況一樣慘不忍睹，逾三成八基金跑輸外匯基金，更有六成二跑輸盈富基金，你話唔係「強輸金」都唔得喇。
強積金回報跌跌不休，而收費就節節上升。調查顯示，近四成五基金開支高於百分之一點六二平均比率，今年實際總開支更加增至一百億元，比八年前高出一倍有多，嚇死人。正如議員批評，現時市面基金數目太多，令人難以選擇，建議將核心基金交由公共受託人營運，減少行政收費，監察投資回報，以及設立全民退休保障制度，彌補強積金制度嘅不足。
你話港產官僚係咪靠害吖，阿茂整餅整個強積金出嚟，話就話為打工仔積穀防饑，點知回報差到無倫，跑輸通脹都算嘞，有時仲要蝕入肉，要來做乜？既然係咁，不如索性取消強積金，將啲錢交番畀打工仔自己管理好過喇，至少唔使連手續費都蝕埋吖嘛，嗰度加加埋埋數目唔少（口架），睇班基金經理個個腦滿腸肥就知喇。
一句講晒，強積金制度荒腔走板，邊係保障打工仔嘅退休生活吖，保障基金公司嘅豐厚利潤就真。之所以會出現咁荒謬嘅現象，除咗因為基金公司飛擒大咬，最主要係港府推卸安老責任，甚至官商勾結，成為基金公司打劫打工仔嘅幫兇。咁多年嚟，社會要求全面檢討強積金嘅呼聲此起彼落，可惜當局唔係闊佬懶理，就係整色整水。唔係咩，近年當局提出所謂嘅改革措施，一時「半自由行」，一時收費封頂，一時核心基金，全部有姿勢冇實際，評價仲差劣過嗰啲掠水基金。
真係諗極都唔明，點解港府到依家仲要推卸安老責任呢？係人都知，要令打工仔無後顧之憂，最直接最有效嘅方法就係設立全民退休保障，而且港府嘅財政能力可謂綽綽有餘。當局係都要做守財奴，係都要以乜鬼結構性財赤恐嚇市民，遲遲唔肯為全民退保開綠燈，有乜辦法唔民怨載道吖？
點講都好，人人都會老，港產官僚對打工仔咁涼薄，唔怕虐老有報應嘅咩！