日子難過日日過，仲有一個月就係佔領行動爆發一周年，呢場禍亂除咗搞到香港雞毛鴨血，而且留下無窮後患，有排執手尾。唔使講其他，成班搞手及幕後黑手至今依然逍遙法外，已經令法治蒙污喇。
呢，有團體做咗項調查，了解市民對泛民政治人物嘅觀感，以反感程度排列，首三位分別係黃之鋒、黎智英及戴耀廷，前兩者反感程度都超過四成六，後者亦有四成四。如果以反對程度淨值排列，有淫賤黎之稱嘅黎智英排名第一，淨值係負百分之十七，排名第二及第三係戴耀廷及黃之鋒，淨值分別為負百分之十點七及負百分之十點二。至於嗰班泛民立法會議員咯喎，亦普遍令人反感，愈激進評分愈低。
所以話，群眾眼睛係雪亮嘅。呢班牛鬼蛇神之所以令人反感，皆因佢哋有破壞冇建設，搞到香港家嘈屋閉，永無寧日。尤其係為期七十九日嘅佔領行動，更加烏煙瘴氣，七國咁亂，幾乎令香港萬劫不復。佔領之亂話就話早已結束，但後遺症陸續有來，例如法治受損、社會撕裂、矛盾加劇等等，你話點樣彌補呢？仲有吖，由佔中捐款醜聞引發嘅港大副校長委任風波愈演愈烈，甚至爆發學生衝擊校委會嘅鬧劇，你話又點樣收科呢？
講到呢度，大家應該知道點解泛民政治人物令人反感。就講淫賤黎吖，佢唔止係佔領行動嘅幕後金主，而且赤膊上陣，成個總指揮咁款，泛民政客圍住佢氹氹轉，簡直醜態百出。當時有市民睇唔過眼，向淫賤黎掟豬雜淋屎尿，搞到佢臭不可聞，點止令人反感，直情令人反胃喇。
話時話，佔領行動都結束咁耐咯，呢班搞手及黑手究竟幾時至落鑊呢？淫賤黎向泛民秘密捐款嘅醜聞仲要查到幾時呢？淫賤黎被踢爆過去幾年向泛民秘密捐款超過四千萬元，引起社會嘩然，廉政公署唔敢怠慢，迅速立案調查，點知查來查去得個吉，到依家仲係無聲無息，日前有份收錢嘅立法會議員梁國雄被邀請到廉署飲咖啡，先至叫做有少少進展咋，唔知仲要拖幾耐。
難怪有人質疑港府怕咗外國勢力，唔敢落案起訴呢班牛鬼蛇神。呢啲質疑唔係冇理由o架，淫賤黎同美國勢力關係密切，佢嘅助手就係有美國軍方情報背景嘅洋人，港府唔敢得罪佢哋咯喎，咪惟有一拖再拖，諗住不了了之囉。
始終都係古人講得啱，禍福無門，唯人自招。香港淪落到咁嘅地步，妖孽為患固然係主要原因，港府姑息養奸同樣難辭其咎嘅咋！