「甜蜜蜜，你笑得甜蜜蜜」鄧麗君嘅歌聲繞樑三日，甜到入心，之不過咁，如果現實中食得太甜，咁就唔同講法嘞，分分鐘食出病來。
係人都知，長期攝取過量糖分，對身體健康有害無益，唔止增加超重、肥胖嘅風險，仲會引致高血壓、心臟病、糖尿病、高膽固醇等疾病添。不過大家未必知嘅係，原來坊間好多飲料都暗藏致胖危機，特別係台式飲料，簡直係健康殺手，飲得多咯喎，隨時糖分爆錶，變大肥佬都似。
嗱，本報記者就幾款港人最愛嘅台式飲料進行糖分測試，結果唔驗唔知道，一驗嚇一跳。先講最熱門嘅珍珠奶茶吖，一個七百毫升嘅樣本，含糖量竟然高達一百二十克，相等於二十四粒方糖，飲一杯已遠遠超出世衞建議嘅每人每日約五十克糖攝取上限嘅兩倍幾，問你怕未。
就算標榜少糖嘅珍珠奶茶，一樣唔好得幾多，含糖量相當於十八粒方糖，所謂少糖，擺明掛羊頭賣狗肉咋。至於蜂蜜綠茶同埋蜜桃乳酸菌飲料，亦分別含有等同七粒及十九粒方糖，所以話，千祈咪畀名稱呃倒，以為飲茶或果汁就好健康，一樣愈飲愈肥嘅咋。
正如營養師話齋，現行嘅食物標籤條例，只適用於預先包裝食物，並無法例監管外賣調製飲品，令業界無意識推動健康飲料，消費者長期攝取過量糖分，增加患病風險之餘，長遠仲會加重公營醫療負擔添。台灣當局喺上月實施專門法例，規定飲品店必須喺飲品上張貼標籤，或以張貼店外嘅形式，展示每款即製飲品嘅含糖量及熱量，偏偏香港喺呢方面零監管，消費者嘅健康仲邊有保障喎。
話時話，減糖係國際潮流，不少國家同城市要求含糖飲料廣告須加註警告標語，證明過量嘅糖已成飲食界「公害」。反觀言必與國際接軌嘅港府，喺呢方面竟然慢三拍，任由「高危」飲品通街賣，你話係咪靠害吖？
講起都唔知好嬲定好笑，早前港府煞有介事成立「食物中鹽和糖委員會」，話要推動市民健康飲食喎，點知到家陣都係得個吹字，講到立法規管即製飲品含糖量，委員會雖然認同大方向正確，但就認為距離立法仲有漫漫長路，事關業界未必贊同喎。講真，鬼唔知阿媽係女人咩，係人都知萬事起頭難，唔通因為有阻力，就置市民健康於不顧？
點都好喇，現代人愈來愈追求健康生活，食得有營真係好重要。港府成日話要減輕公營醫療開支，與其推出唔湯唔水嘅自願醫保，不如切實規管食物中嘅鹽和糖好過喇。