粵語長片有以下經典情節︰主人公為咗供仔女讀書，不惜做幾份兼職，捱到咳血，為免家人擔心，偷偷將染血嘅手巾仔收埋。嗱，雖然話時代進步咋，但其實父母供書教學一樣唔輕鬆，第樣唔講，淨係幼稚園學費年年加，都已經夠惡頂喇。
唔係講笑（口架）。教育局數字顯示，今年全港有近八百間幼稚園獲准加學費，佔全港幼稚園總數超過八成，平均加幅達百分之八點三，遠遠跑贏通脹，都咪話唔得人驚。
可能有人會話，家長有學券補貼，負擔有限啫。表面冇錯係咁，特別係今年學券資助額增加達一成二，夠抵銷學費加幅有餘，但唔好忘記喎，百分之八點三只係平均數，有學校之前四年申請加價唔成功，今年為咗「收復失地」，一次過加價四成，你話嘞，學券加幾多都唔夠冚喇。
好嘞，即使唔講咁極端嘅例子，實際上學券好睇唔好食，家長倒貼係家常便飯。教育局話就話為幼稚園學費設立上限，規定唔可以超過成本價百分之十五，以防校方獅子開大口，弊在雜費不在監管之列，好多學校巧立名目，書包、文具、生日會收費仲算正路，有啲甚至收埋寢具費，五花八門，無奇不有，令人嘆為觀止。審計署之前進行過調查，發現個別幼稚園雜費佔學費收入逾四成，每年講緊成千萬元，而且好多帳目唔對外公開，根本無王管。
當然喇，銅板永遠有兩面，家長嫌學券幫補有限，幼稚園何嘗唔係大呻經營困難？燈油火蠟、最低工資、校舍租金，一闊三大，全部都係錢，羊毛出自羊身上，絕對唔出奇。尤其係租魔肆虐撳住搶，簡直冇啖好食。大家應該記得舊年有幼稚園因為捱唔起貴租而被迫遷，幾百個學生淪為人球。成日話地產霸權當道，估唔到連辦學團體都無法幸免，真係講起都幾悲哀。
所以話，學券制原意唔係話唔好，但涉及好多監管同行政工作，唔係咁簡單。你知啦，港產官僚出名敷衍塞責，卒之咪搞到家長同學校怨聲載道，豬八戒照鏡——裏外不是人囉。其實使乜咁煩吖，推行學前免費教育，有條件嘅家長，鍾意嘅可以自己送仔女讀私校，咁咪乾手淨腳皆大歡喜囉。真係諗極都唔明，學前免費教育又唔係咩新鮮事物，澳門等地早就實行，港府亦承認成本同學券制相差無幾，點解拖到依家仲係議而不決呢？
吳局長呀吳局長，十五年免費教育事在必行，一味拖只會激起更大民怨，如果做番場好戲，省靚個招牌，話唔定可以搣甩「唔得掂」個朵呢！